Colectivo Fusquenlla

O Ministerio de Medio Ambiente iniciará hoxe, a través da Dirección Xeral da Sustentabilidade da Costa e do Mar, a última fase da demolición do hotel da praia de Ber, en Pontedeume, unha actuación que suporá a incorporación ao dominio público marítimo terrestre de 3.730 metros cadrados de superficie.
Os traballos para a derriba do inmoble, situado en primeira liña de praia, comezaron o pasado mes de novembro. Nunha primeira fase, o departamento estatal desmantelou o interior do hotel Mar Muíño e separou os residuos xerados, clasificando madeiras, tabiquería, cerámica, residuos metálicos, escaiolas, vidro e aveños domésticos, entre outros. Hoxe está previsto que entren as máquinas encargadas de desmontar as catro plantas do edificio e de trasladar os materiais a un xestor autorizado. Segundo informou o Ministerio de Medio Ambiente, estes 3.730 metros cadrados, unidos aos recuperados pola demolición do restaurante Anduriña -situado á beira do hotel- supón rescatar máis de 7.000 metros cadrados de terreo, para uso público.
A derriba do Mar Muíño, actuación orzada en 3,3 millóns de euros, supuxo “unha das máis emblemáticas destas características realizadas nos últimos anos en Galicia”, segundo destacou onte o Ministerio de Medio Ambiente. As directrices da Dirección Xeral de Sustentabilidade para este enclave foi a adquisición destes inmobles e a súa posterior demolición.
O próximo ano, a Dirección Xeral de Sustentabilidade da Costa e do Mar redactará un proxecto para ordenar este espazo de acordo cos parámetros establecidos na “instrución para o tratamento do bordo costeiro”. Con iso, aspira a mellorar o uso público, a accesibilidade ao areal e a ordenación dos estacionamentos, en concordancia cos parámetros de sustentabilidade do Ministerio. La Opinión