Colectivo Fusquenlla

O candidato popular á alcadía de Pontedeume manifestábase moi convencido sobre as solucións dos problemas do concello . Pero iso era antes das eleccións. Despois xa se sabe o que sucedeu: todo a práctica desdicía as palabras do actual alcalde. As razóns desta viraxe deben ser analisadas polos estudosos da condición humana. A nós só nos toca laiarnos do declive do concello de Pontedeume

Nunha entrevista que Gabriel Torrente concedía a La Opinión reseñaba aqueles puntos do seu programa que máis preocupaban ao electorado. E dende logo o urbanismo era a pedra quente dos candidatos, habida conta que o anterior goberno perdera a credibilidade polas numerosas infraccións cometidas e consentidas.

Comezaba o aspirante cunha declaración moi acertada da situación calamitosa da vila.  Preguntado polo proxecto máis urxente na súa opinión, responde:

“A limpeza da vila a todos os niveis. Está feito todo un desastre: prazas levantadas, nas parroquias tardan dous ou tres días en recoller o lixo, non limpan os colectores… Tería que ser o sinal de identidade da vila”

De preguntarlle hoxe pola situación actual tería que admitir que ese problema estendeuse ao núcleo urbano da vila, que as prazas seguen levantadas e que os colectores, ademais de sucios, están deteriorados.

Outra das preocupacións de Torrente é a fachada marítima e critica o  proxecto de colexio supermoderno que califica de mamotreto:

“A fachada marítima é impresionante e non hai unha orde nela. Gustaríanos facer un plan integral, pero xa non é posible. Dos almacéns de Raxoi xa nin falalo, é outra vergoña. Van facer un colexio, pero segundo os papeis que vin, parece ser que é supermoderno. Esta é unha vila histórica, onde está a relación entre os almacéns de Raxoi, os antigos xulgados e o colexio? Non integran, plantan un mamotreto, que está moi de moda…”

Esta defensa do valor histórico da vila e a necesidade de adecuar as construcións á arquitectura patrimonial e artística colisiona coas pretensións do alcalde de construír unhas rotondas  con pasos subterráneos en plena entrada do casco histórico. Un conxunto no que cada día “desaparece” algo da súa historia. E todo pola desidia dos que gobernando Pontedeume non valoran o incalculable valor do seu patrimonio. E non imos falar dos almacéns de Raxoi ou da Alameda do mesmo nome, sede do botellón, uns,  e aparcadoiro improvisado, a outra.

Preguntado polas directrices do PP en materia de urbanismo, amosa unha preocupación que hoxe debeu erradicar do seu pensamento. “

Cumprir a lei. Que saia adiante o plan xeral de urbanismo será moi importante, pero non o máis importante para o cidadán de a pé. Posiblemente afecte un pouco máis á xente das parroquias. Hai xente da vila que non sabe o que é o PXOM. Os interesados son outros. Non creo que en Pontedeume fagan falla moitas máis vivendas. Levo 23 anos no mesmo edificio e sempre houbo pisos baleiros. Non hai carencia, especúlase con eles, e trataremos de evitar iso por todos os medios”

Difícil soster semellante incoherencia coa realidade actual. O PXOM, que Torrente consideraba unha preocupación dos especuladores, hoxe está secuestrado polo equipo de goberno para beneficiar a eses que antes criticaba e que xa están adquirindo terreos á espera de que sexan urbanizados polo novo planeamento.  Estes promotores que  temían non poder levantar urbanizacións no rural, exixen agora tempo para comprar terreos a prezos rústicos antes de que o PXOM os convirta en urbanizables. Porque co novo goberno galego moitos pensan que a lexislación permitirá  un plan de urbanismo menos  restrictivo. Vivendas sobran pero iso non impide cementar a paisaxe eumesa.

Tampouco escatima palabras para defender o marisqueo, unha actividade que outrora supuxo unha importante fonte de ingresos e que hoxe pasa por unha grave crise á que o saneamento e a contaminación do eume non son alleas. Preguntado se promoverá o marisqueo e mellorará o saneamento, afirma:

“Claro que si, pero doutra forma. Aquí houbo un boom co do Prestige. Cerrouse toda a costa e en Pontedeume gañáronse moitísimos cartos. Agora traballan todo o ano e por comentarios, porque estou un pouco afastado, parece ser que as capturas están a diminuír moitísimo… Se botamos verteduras continuamente á ría, para que queremos unha depuradora? “

Outro temor disipado co tempo. O Concello de Pontedeume non respaldou ningunha medida tendente a eliminar a contaminación que padece o río Eume provocada supostamente polas obras da autovía, e a día de hoxe os verquidos á ría da rede de saneamento son frecuentes. Toda unha riqueza, a marisqueira e piscícola, que desaparecerá por mor da neglixencia e abandono dos representantes da administración pública.