Queixas dos veciños polos verquidos de augas fecais
A Asociación de Veciños de Boebre láiase dos verquidos de augas fecais na praia de Ber. Os causantes serían as numerosas vivendas que non dispoñen de alcantarillado. A lei obriga aos promotores a dotar de servizos tales como redes de saneamento, zonas verdes, aparcadoiros, etc. A realidade aseméllase máis a unha coñecida película de Woody Allen: colle o diñeiro e corre. Os promotores aforran gastos e o goberno local ignora as infraccións.
O resultado despois de tantos anos de desleixo está a vista. A ría de Pontedeume é unha das máis contaminadas de Galiza. A Dirección Xeral de Recursos Mariños e o Instituto Tecnolóxico para o Control do Medio Mariño de Galicia, elaboraron un informe relativo á situación actual das zonas de produción de moluscos en distintas rías. Moi poucas melloraron a súa situación, outras non sofren variación e as máis empeoraron. Os casos máis graves corresponden á ría de Ferrol e á de Ares-Betanzos-Pontedeume.
A depuradora de Pontedeume está considerada fóra de uso pola Consellaría de Medio Ambiente polo que hai que engadir os verquidos procedentes do núcleo urbano e mesmo os de Cabanas aos focos causantes da contaminación. Unha situación deplorábel que incumpre todas as directivas da Unión Europea sobre tratamento de augas residuais.
Varios son os puntos do litoral eumés nos que se detectan urbanizacións á marxe da legalidade que contribúen a esta contaminación da nosa ría. En Boebre e Vizús (Centroña) os promotores levantaron numerosas vivendas en zonas de especial protección. Se ben algunhas denotan certo gusto arquitectónico, outras son aberrantes exemplos dun urbanismo especulador xa caducado. Non debe estrañarnos que nun futuro todas elas sigan os mesmos derroteiros que as vivendas de Nogueirosa sobre as cales pesan ordes xudiciais de demolición.
A nosa administración local -da igual o partido- acostumouse, co beneplácito dunha parte da cidadanía, desinformada, desinteresada e desmovilizada, a desprezar aquilo que temos de máis valor. O deterioro ecolóxico da ría, do río Eume, o crecemento urbanístico descontrolado e caótico, a ruína do casco histórico, a rede de saneamento obsoleta, o ineficaz servizo de recollida de lixo -que que nos convirte nunha das vilas máis sucias da comarca-, o tráfico constante de vehículos que atravesan a vila e que utiliza ata os patios das escolas como aparcadoiro, convírtenos nun retrato perfecto do tercermundismo desarrollista.
Supoño que o culpábel de todo isto, máis que o propio Concello e aqueles que aplauden a súa xestión, faga o que faga, son os cidadáns
descontentos,protestóns e incapaces de convivir diariamente con tanto despropósito.