A gran estafa
Por fin o alcalde de Pontedeume acaba de confirmar o que hai tempo denunciamos dende Fusquenlla: o PXOM retírase da circulación e agárdase por tempos mellores nos que a nova Lei do Solo permita cementar o concello eumés. E faino sen amosar o máis mínimo pudor ao recoñecer que estivo mentindo a toda a cidadanía. Despois de dous anos nos que asegurou que o plan de urbanismo estaba a piques de ser presentado para a súa aprobación inicial, de que só faltaban pequenos retoques, despois de desmentir os comunicados de Fusquenlla que o acusaban de poñer atrancos á tramitación do plan xeral, agora admite sen ruborizarse que Pontedeume vai quedar sen ordenamento urbanístico porque os empresarios da construción e os especuladores prefiren a desorde actual. Unha desorde que engorda as súas contas corrientes auspiciada por políticos corruptos e técnicos irresponsables.
Pontedeume está a encherse de construcións ilegais tanto no casco histórico como no rural. O alcalde non atende as denuncias dos que exiximos un urbanismo racional e sostíbel para o noso concello. Pero tampouco atende os requerimentos do Valedor do Pobo nin siquera as ordes de paralización ditadas pola Xunta. Un goberno que se sitúa á marxe da legalidade e ponse ao servizo dos que se enriquecen a costa do patrimonio arquitectónico e paisaxístico está a cometer un gran fraude aos cidadáns que agardaban por un PXOM que puxese fin ás múltiples aberracións urbanísticas cometidas nos últimos anos. E tamén fai gala dun insultante menosprezo cara aos veciños, considerados meros observadores dos trapicheos entre políticos e promotores, sen capacidade de decisión.
Nunca un rexedor atreveuse a tanto en Pontedeume, hipotecando o futuro do concello, impulsando a definitiva destrución do casco histórico e dilapidando as arcas municipais con pagos gratuitos pola redacción de proxectos inutilizados. Este alcalde, que acaba de descubrirse como o gran benefactor dos especuladores do chan, parece incitar á mobilización como único recurso para facer valer o dereito de Pontedeume a dotarse dun plan de ordenación urbanística. Agardar por unha nova Lei do Solo supón engadir tres anos máis á unha longa espera que xa supera os 23 anos. Unha carencia que xa acarreou numerosos e irreparables prexuizos.
Yo creo que en este comentario os estáis excediendo un poquito.
Un poco de calma y un mucho de contención, que cuando se desproporciona uno, tiende a meter la gamba.