Unha estrada como coartada para urbanizar
Se algo caracteriza á personalidade dos promotores inmobiliarios é a obstinación, a artimaña e o anhelo desmesurado de riqueza. Cando foi presentado á Xunta o PXOM de Pontedeume, este foi rexeitado, entre outras cousas, pola enorme cantidade de solo urbanizábel que se recalificaba. Algo innecesario no noso concello dado o crecemento vexetativo da poboación ou para ser máis exactos, o decrecemento. Aquilo foi un varapao ás pretensións da empresa Consultora Galega redactora do plan. Agora esta mesma empresa presenta o informe de impacto ambiental que deberá acompañar ao novo borrador do PXOM para a súa aprobación inicial. Dende estas mesmas páxinas insistimos, e así fixémosllo saber ao goberno local, que as modificacións que se deberían facer ao planeamento urbanístico deberían ser as exixidas pola CPTOPT como único medio de conseguir a súa aprobación definitiva. Pero a insistencia de Consultora Galega en conseguir a maior cantidade de chan urbanizábel empeza a ser sospeitosa. No devandito informe de impacto ambiental presentado recentemente á Consellaría (ao cal lle adicaremos unha análise máis profunda e as conseguintes alegacións), aparece a previsión dunha nova estrada cuxo único fin é a urbanización dunha grande extensión de terreo no que se asentan fincas de coñecidos propietarios.
A nova vía comeza o seu trazado na estrada nacional, á altura de Vilar, e remata na mesma estrada á altura do polígono do Vidrieiro, despois de adentrarse nunha paraxe rural rica en arboleda e visualmente atractiva. No seu percorrido pasa a carón da propiedade do director de Caixa Galicia, para bordear logo as instalacións de Einsa, a empresa que hai escasos meses solicitou recalificar os terreos da súa propiedade. O arquitecto redactor daquel plan pertencía a Consultora Galega. Como se lembrará, o colectivo Fusquenlla denunciou que Einsa tiña unha empresa adicada a promoción inmobiliaria, o que explicaría a pretendida recalificación.
Non poden alegar aquí que a razón desta nova estrada sexa a deconxestión do tráfico rodado; a estrada comeza e remata na mesma Nacional 651. Tampouco que sirva para dotar de servizos aos residentes pois como se aprecia no mapa é unha zona deshabitada. Ata os máis inxenuos concluirán que a razón deste trazado é conseguir urbanizar o que hoxe é solo rústico e transformalo mañá en zona residencial coa conseguinte revalorización para os privilexiados propietarios.
Esta proposta ven darlle a razón aos propietarios das terras que no mes de marzo quería expropiar EINSA ,apoiada polo anterior goberno.
Temos concelleiros que denominaron aos propietarios “alarmistas”, pode ser que daquela o pareceran, pero despois de ver o plan que Fusquenlla nos amosa, está moi claro que ían na boa direción as suas “alarmas”.
Esperamos que o actual goberno faga uso do sentido común e non se deixe levar polas palabras bonitas que de seguro van decir os “artistas de consultora galega”.
Pero se o goberno non e quen de usar ese sentido que non e tan común, como moitos din, sempre queda a oposición que de seguro a de mirar as cousas do urbanismo con outros ollos que non tiña hai 6 meses.