Ver no PXOM
Do dito ao feito hai un treito. Sábeno ben os redactores do PXOM quen nun dos parágrafos do documento louvan a paisaxe de Pontedeume e recoñecen a aberración que supón a urbanización de Ver: A paisaxe de Pontedeume, posúe unha configuración topográfica moi singular, na conxunción de dous importantes e característicos entornos, o de interior e o costeiro, aínda que se produciron importantes distorsións paisaxísticas como a que existe no conxunto urbanístico da praia de Ver. En calquera caso, a paisaxe é un elemento que debe ser protexido non só por esixencias éticas, estéticas e, mesmo, xurídicas, senón por razóns económicas: é ela mesma un ben económico que é preciso conservar e/ou poñer en valor segundo os casos.
Os feito
s son outros. O plan de urbanismo contempla unha nova urbanización en Ver a carón da actual. Nunha extensión de 25.000 m2 vanse construír 68 vivendas. Esta urbanización suporía unha impactante barreira arquitectónica que, amais de destruír a paisaxe, suporía agravar aínda máis a carencia de servizos básicos tales como saneamento, depuración, recollida do lixo, alcantarillado e abastecimento auga.
No anterior borrador do PXOM, rexeitado pola Xunta, tentábase convertir Pontedeume nunha grande masa de solo urbanizable. As modificacións introducidas no actual documento tentan eludir a oposición da Xunta no relativo á creación de núcleos residenciais. Os redactores do planeamento atoparon a fórmula máxica para urbanizar en zonas de alto valor paisaxístico e de forte demanda: crearon da nada os núcleos urbanos de Ver e Arbosa, categoría equiparable á do núcleo urbano de Pontedeume. No informe autonómico antes citado, que Consultora galega parece non ter lido, indicábase que non se atopa xustificada a súa inclusión de Ver e Arbosa como solo urbano.
Recualifícase Ver como núcleo urbano cando non era máis que rústico. E iso sen contar cos mínimos servizos propios dos núcleos urbanos: as conducións de auga adoecen de deficiencias por falta de presión e polas tubaxes de fibrocemento; a rede de Ver recolle as augas residuais e fecais da conca do núcleo urbano, así como dos núcleos de Xabroal, O Sixto e Parga. A rede remata na praia de Ver, onde se produce un verquido ó mar sen depuración a través dun emisario submarino. Pola contra o PXOM non contempla a construción de ningunha depuradora en Ver
Esta nova catalogación como núcleo urbano non só permite “legalizar” infinidade de vivendas que foron construídas en zona de protección costeira senón que promove a construción doutras novas, consolidando un núcleo que está considerado como a maior aberración urbanística do litoral eumés.
Lembremos tamén que a Deputación ten aprobada a construción de beirarrúas na estrada de Perbes ata Boebre. Curiosamente o tramo a construír remata no lugar no que o PXOM contempla a construción da urbanización e que a día de hoxe non ten ningunha poboación, mentres que Centroña, cun amplo núcleo rural, quedará sen as necesarias beirarrúas.
Dádevos conta que os permisos para construír só benefician aos grandes promotores. Estes terreos xa están comprados por unha empresa. Mentres tanto, os propietarios de pequenas leiras non podemos facer unha casa porque os núcleos rurais non se ampliaron.