Colectivo Fusquenlla

Mirando detidamente a normativa urbanística do PXOM escandalizámonos pola forma con que este planeamento pretende urbanizar certos sectores. Se botamos man da lei do solo (lei9/2002) veremos que existen varias formas de acometer a urbanización dos terreos declarados urbanizables ou urbanos non consolidados. Pero a máis lesiva para os propietarios dos terreos, mellor dito para os pequenos propietarios, é o chamado sistema de compensación:

Lei 9/2002
Sistema de compensación
Artigo 154º.-Concepto.

No sistema de compensación, os propietarios achegan os terreos de cesión obrigatoria, realizan á súa custa a urbanización nos termos e condicións que se determinen no plan e constitúense en xunta de compensación.

Artigo 155º.-Constitución da xunta de compensación.
Cando o sistema de compensación veña establecido no planeamento para un determinado polígono, a súa efectiva aplicación requirirá que os propietarios presenten o proxecto de estatutos e de bases de actuación, e que no momento de aprobación definitiva daqueles superen o 50 % da superficie do polígono.

Art.156º.-Se algúns propietarios do polígono non se incorporaran á xunta de compensación, esta poderá solicitar do municipio ou ben a expropiación dos ditos predios, tendo a condición de beneficiaria dela, ou ben a ocupación dos ditos predios en favor da xunta de compensación a fin de posibilita-la execución das obras de urbanización previstas, recoñecéndoselles ós seus titulares o dereito á adxudicación de terreos edificables en proporción á superficie achegada coa reducción adecuada para compensa-los gastos de urbanización correspondentes.

É dicir, se un propietario ou grupo de propietarios acumula máis dun 50 % dos terreos a urbanizar poden formar a chamada xunta de compensación que terá como obxectivo proceder á urbanización dos terreos en cuestión, soportando as cargas que diso se deriven. Mais se algún propietario decide non involucrarse nesta xunta por non dispor dos medios necesarios para sufragar os gastos, pode ser expropiado pola mesma.

Este sistema de tristes antecedentes no noso país, lembremos a urbanización de Fadesa en Miño, vai ser aplicado tamén aos veciños de Andrade se finalmente o plan de Einsa é aprobado. Pero non é único caso que figura no PXOM de Pontedeume. Case todas as zonas urbanizables contarán con este modelo de actuación o que significa conceder privilexios feudais aos que posúen a maior parte das fincas e deixan á iniciativa privada a ordenación do noso concello.

Entre os sectores que van ser programados polo sistema de compensación merece destacar un que só pode explicarse se detrás desta concesión existe un convenio entre promotores e Concello. Referímonos ao denominado sector 1 do solo urbano non consolidado. É unha extensa área de terreo comprendido entre a estación do ferrocarril e a estrada de Centroña, e comprende todos as parcelas que hai baixo o chamado “mamotreto” de Caldagueiro ata a edificación paralizada da Av. do Ferrol. Obras todas elas dirixidas por Lagares e compañía.

Este famoso promotor sae dobremente beneficiado polo plan de urbanismo. Se por unha banda legaliza o mamotreto sobre o que pesan cinco ordes de paralización que nunca foron acatadas por Lagares Inmobiliaria, pola outra consegue urbanizar ao seu libre albedrío unha franxa de terreo que a Xunta de Galiza considera de especial protección polo seu valor paisaxístico. Unha vez máis o Concello de Pontedeume, co seu goberno á cabeza e os partidos que o apoian, fai caso omiso das directrices emanadas da CPTOPT. O impacto visual das novas construcións acentuará aínda máis a estremecedora visión que produce o edificio de Caldagueiro.

Queda unha última pregunta que o Concello debería responder. Por que estes agasallos a unha empresa  predadora como a que nos ocupa? Antecedentes de chanchullos entre promotores e Concello podemos lembralos. Deixar construír un enorme edificio arredor do chalé rosa tivo como pago ao Concello dúas miserentas prazas de garaxe e un baixo; a ampliación da casa da praza do Conde a expensas do solo público foi remunerada con otras prazas de garaxe. Preguntámonos se o permiso para cementar Caldagueiro foi recompensado coa cesión para uso público do solar da praza de España.

O que si parece claro é que o PXOM de Pontedeume pretende converter en papel mollado as directrices da Xunta sobre ordenación do territorio e a protección de lugares de singular importancia.