Caldagueiro, ilegalidades, desacatos e favoritismos
A historia de Caldagueiro xa é un paradigma da situación urbanística de Pontedeume con todas as súas incongruencias, cambalaches, arbitrariedades e especulación.
O novo PXOM tenta legalizar unha das maiores infraccións que se cometeron no noso concello. Hai que lembrar que o edificio que Lagares Inmobiliaria, S.L. levantou en zona declarada non urbana pola Xunta de Galiza conta xa con varias ordes de paralización ditadas tanto pola CPTOPT como polo propio goberno local. Este feito por si só debería ser suficiente para que o Concello non lle dese agora estatus legal pola vía do plan xeral. Unha contradicción difícil de entender cando ademais o actual alcalde instou ao promotor a axustar as obras á licenza concedida, derrubando o ilegal e impoñéndolle, en caso contrario, unha serie de multas coercitivas ata que se repuxese a legalidade.
Lagares presentou un recurso ante o xulgado que lle foi desestimado. O recoñecemento xudicial da postura do executivo local non amilanou a este promotor que quebrantou as ordes do consistorio tantas veces que merece ser considerado o maior insubordinado da historia de Pontedeume. Curiosamente é o noso concello un dos poucos onde se premia o desacato. E a proba témola no PXOM, que concede a Lagares un dos maiores beneficios aos que un promotor pode aspirar.
Por obra e gracia da achaiadura urbanística os terreos nos que se levanta o mamotreto pasan a ser urbanos, o fondo edificable pasa de doce a quince metros, a edificabilidade supera a permitida pola Lei de Ordenación Urbanística, a cesión do promotor para espazos libres e zonas verdes é inferior á estipulada pola mesma lei, e, por último, se lle outorga ao insigne construtor a posibilidade de seguir construíndo nun espazo que a Xunta declara como de protección paisaxística e costeira. Toda unha serie de prebendas que poden ser entendidas pola cesión que este promotor fai de certas parcelas para disfrute do Concello. Entendidas pero non xustificadas. A cesión de bens non pode eximir do cumprimento do lexislado na LOUPMR de Galiza, aínda que moitas veces parece que os promotores disfrutan dunha bula papal para sortear as obrigas que as leis impoñen.
Ademais non teñen nin a decencia de delimitar todo o ámbito como urbano non consolidado e ceder á colectividade o que legalmente obriga a lei, era o mínimo para que se poidese tomar esto como admisible. Os promotores non queren perder nin un metro cadrado do que tiñan programado, a ambición é excesiva, e para os gobernos a solución das cousas pasa por bailarlles as augas e darlles os parabens. Ese é o problema, aos politicos os cega os supostos ingresos polas licencias é non se dan conta dos ingresos que deixan de recibir por cesións obligatorias son mais do doble que as propias licencias. Finalmente teremos que comprar os terreos para o centro de día e o campo de futbol cando si o PXOM se fixese con cabeza e dacordo coa lei todo tiña que ser por cesións gratuitas.