O prezo da auga en alza
A Consellería de Medio Ambiente destinará 618.172 euros á restauración das zonas de captación de fontes e mananciais en parques naturais, tendo en conta a importancia que estes teñen para o hábitat e ecosistemas. Estas obras realizaranse nos parques da Serra do Xurés, Fragas do Eume, Serra da Enciña da Lastra, Serra do Invernadoiro, Corrubedo e Monte Aloia.
A esta primeira batería de actuacións, que se levarán a cabo pola vía de emerxencia para garantir a súa execución inmediata, se sumarán as que a Consellería de Medio Ambiente porá en marcha a medio prazo e que pretenden solucionar de xeito estrutural problemas de abastecemento en grandes núcleos de poboación de Galicia. Esta segunda parte do plan contra a seca está agora mesmo en fase de elaboración e serán presentadas a mediados do próximo mes de xaneiro.
Un gran interese por parte de Medio Ambiente en garantir o abastecemento de auga en época de escaseza. Teríamolo que agradecer se non fose porque nas próximas semanas vaise desviar auga do río Eume para encher o oco da mina d’As Pontes que Endesa explotou durante décadas. Unha contradicción á que xa nos teñen acostumados os nosos políticos que predican pola boca e degradan coa sinatura. A solución escollida pola empresa e lexitimada pola Consellaría de Medio Ambiente é a máis económica pero tamén a máis lesiva dende o punto de vista medioambiental. Amais de desabastecer ao Eume por un período non menor a catro anos, poderíase alterar a calidade das augas do lago e trasladar a contaminación aos acuíferos dos que agora se queren aproveitar as súas augas. A corrosión das augas degrada o ecosistema fluvial, ata ser incapaz de manter formas de vida acuáticas, e a solubilidade de metais pesados aumenta, provocando a toxicidade das augas. O parque natural das Fragas do Eume corre perigo se a súa principal arteria, o río Eume, sofre as restriccións de caudal que se anuncian para o vindeiro mes.
No mes de outubro, a Sociedade Galega de Historia Natural, Verdegaia e Fusquenlla dirixiron un escrito á Consellaría de Medio Ambiente no que se solicitaba un estudo independente sobre os efectos do enchido da mina de As Pontes. O único informe realizado foi por encargo da propia empresa, e aceptado como bo pola Consellaría. (Máis información aquí)
